ઇઝરાયલ સરકારે ઇરાનની લાંબા અંતર મિસાઇલ ક્ષમતાને કારણે યુરોપના મુખ્ય શહેરો પર ખતરો વધ્યો હોવાની ચેતવણી આપી.

ઇઝરાયલ સરકારે ઇરાનની લાંબા અંતર મિસાઇલ ક્ષમતાને કારણે યુરોપના મુખ્ય શહેરો પર ખતરો વધ્યો હોવાની ચેતવણી આપી

તહેરાનઃ મધ્યપૂર્વમાં ચાલી રહેલું યુદ્ધ અત્યારે ઉગ્ર બની રહ્યું છે. તેવામાં ઈરાને ઇઝરાયલ પર હુમલો કર્યો હોવાનું પણ પ્રકાશમાં આવ્યું છે. જેથી ઇઝરાયલ સરકારે ઇરાનની લાંબા અંતર મિસાઇલ ક્ષમતાને કારણે યુરોપના મુખ્ય શહેરો પર ખતરો વધ્યો હોવાની ચેતવણી આપી છે. ડિએગો ગાર્સિયા આસપાસના સંઘર્ષ પછી ઇઝરાયલી સુરક્ષા વિભાગે કહ્યું છે કે, ઇરાનની નવી મિસાઇલ લંડન, બર્લિન અને પેરિસ જેવા શહેરોને પણ નિશાન પર લાવી શકે છે.

યુરોપ અને ઉત્તર અમેરિકામાં મિસાઇલ હુમલાની આશંકા

ડિએગો ગાર્સિયા એ હિંદ મહાસાગરમાં આવેલું યુકે‑યુએસ સંયુક્ત સૈન્ય બેઝ છે. રિપોર્ટ મુજબ, ઇરાને આ બેઝ પર દીર્ઘ‑અંતરની મિસાઇલ પ્રહાર કરવાનો પ્રયાસ કર્યો, પરંતુ આ મિસાઇલ સફળતાપૂર્વક ટાળી દેવાઈ અને બેઝને માત્ર થોડું નુકસાન થયું હતું. આ ઘટના પછી યુરોપ અને ઉત્તર અમેરિકામાં મિસાઇલ ખતરાની ચર્ચાઓ શરૂ થઈ છે. 

આ દેશ પર ખતરાની ચિંતા વધી

ઇઝરાયલ ડિફેન્સ ફોર્સિસ (IDF) મુજબ, ઇરાને લગભગ 4,000 કિમી સુધી પહોંચ ધરાવતી નવી મિસાઇલ પ્રણાલી વિકસાવી છે. આ શ્રેણીમાંથી યુરોપના દેશો જેવા કે ફ્રાંસ, જર્મની અને યુનાઇટેડ કિંગડમ સુધી પણ ખતરાની ચિંતા વધી રહી છે. IDFએ કહ્યું છે કે “ઇરાનનો આતંકવાદી શાસન ગ્લોબલ સ્તરનો ખતરો છે અને તેની મિસાઇલ લંડન, પેરિસ અને બર્લિન જેવા મહાનગરોને પણ નિશાન પર રાખી શકે છે. 

ઈરાની મિસાઈલ રેન્જનો મેપ સોશિયલ મીડિયા શેર થયો

મહત્વની વાત એ છે કે, ઈરાની મિસાઈલો વિશ્વના અનેક દેશોને નિશાન બનાવી શકે છે તેવો ઇઝરાયલે દાવો કર્યો છે. એક્સ પરની એક પોસ્ટમાં ઇઝરાયલી સૈન્યએ દાવો કર્યો હતો કે, આ મિસાઇલો 4,000 કિમી સુધીની મુસાફરી કરી શકે છે. આ રેન્જમાં ભારત પણ આવી જાય છે. ઇઝરાયલ દ્વારા આ રેન્જનો એક મેપ પણ સોશિયલ મીડિયા પર શેર કર્યો છે. મધ્યપૂર્વનું આ યુદ્ધ આખા વિશ્વ માટે ચિંતાનો વિષય બની ગયો છે.