ગુજરાતમાં ચોમાસુ આવી રહ્યું છે ધીમેપગલે .છેલ્લા 24 કલાકમાં 78 તાલુકામાં વરસાદ, સૌથી વધુ કુકરમુંડામાં ખાબક્યો ચોમાસું બરોબરનું જામ્યું

ગુજરાતમાં ચોમાસુ આવી રહ્યું છે ધીમેપગલે .છેલ્લા 24 કલાકમાં 78 તાલુકામાં વરસાદ, સૌથી વધુ કુકરમુંડામાં ખાબક્યો

રાજ્યમાં છેલ્લા ઘણા દિવસથી વરસાદની રાહ જોવાઈ રહી હતી. જો કે છેલ્લા ત્રણ ચાર દિવસથી દક્ષિણ ગુજરાત હળવાથી ભારે તેમજ સૌરાષ્ટ્રના કેટલાક ભાગોમાં છૂટાછવાયા વરસાદની થોડે અંશે રાહત મળી હતી. ત્યારે હવે ચોમાસું બરોબરનું જામ્યું હોય તેમ રાજ્યના 78 તાલુકામાં વરસાદ નોંધાયો છે. જેમાં તાપીના કુકરમુંડામાં સૌથી વધુ ત્રણ ઈંચ વરસાદ ખાબક્યો છે. આ ઉપરાંત વ્યારા, વલસાડ, બોડેલી, નિઝર તેમજ નર્મદાના સાગબારામાં પણ વરસાદ વરસ્યો છે.

સૌરાષ્ટ્ર સહિત સમગ્ર ગુજરાતમાં રવિવાર તથા સોમવારે વ્યાપકપણે એટલે કે ૫૦ ટકાથી વધુ વિસ્તારોમાં વરસાદનું ઓરેન્જ એલર્ટ આજે જારી કરાયું છે. જેનો અર્થ તંત્રને સર્જાનારી સ્થિતિ માટે તૈયાર રહેવાનો મેસેજ હોય છે. રાજ્યના કેટલાક છૂટાછવાયા વિસ્તારમાં ભારે વરસાદની પણ સંભાવના છે. અરબી સમુદ્રમાં વાદળોની જમાવટ સાથે વરસાદી સીસ્ટમ બની છે,

તાપી ઉપરાંત સુરતના માંગરોલ, વાલીયા, નસવાડી, હાલોલ અને ઉમરગામમાં એક ઇંચથી વધારે વરસાદ નોંધાયો છે. ઉલ્લેખનીય છે કે વરસાદને પગલે વાતાવરણમાં ઠંડક પ્રસરી ગઈ હતી. 

જેના પગલે લોકોને રાહત મળી હતી. તેમજ ખેડૂતોમાં ખુશી જોવા મળી હતી. હવામાન વિભાગે આજે (23 જૂન) અમદાવાદ સહિત અનેક જિલ્લાઓમાં છૂટાછવાયા તેમજ ભારે વરસાદની આગાહી કરી છે. હવામાન વિભાગના જણાવ્યાનુસાર આજે ગાંધીનગર, બનાસકાંઠા, અરવલ્લી, ખેડા, આણંદ, મહીસાગર, વડોદરા તેમજ દક્ષિણના મોટા ભાગના વિસ્તારોમાં વરસાદની સંભાવના છે. જ્યારે ગીર સોમનાથ, વલસાડ, દમણ માટે ઓરેન્જ એલર્ટ અને જૂનાગઢ, અમરેલી, ભાવનગર, ભરૂચ માટે યલો એલર્ટની ચેતવણી અપાઈ છે.