હિટ સ્ટ્રોક સામે હેટ સ્ટ્રોકનું શસ્ત્ર ઉગામો! મનુષ્ય તુમ આગે બઢો, વિનાશ તુમ્હારે સાથ હૈ! ગર્વ કરો, આપણે પૃથ્વીનું તાપમાન વધારવા સક્ષમ થઈ ગયા!

હિટ સ્ટ્રોક સામે હેટ સ્ટ્રોકનું શસ્ત્ર ઉગામો!

 કદાચ આ ઘમંડી અને છાસવારે 'હવાઓ' કરતી પૃથ્વીને ખબર જ નથી કે આપણી પાસે 'આર્ટિફિસિયલ ઈંટેલિજેન્સ' છે! આપણે ચંદ્ર ખૂંદી વળ્યા છીએ, સીમાડે વીરડા ગાળીને ભલે બેડા ભરીએ છીએ પરંતુ મંગળ ઉપર પાણી છે કે નહી તે તપાસવા ત્યાં રોવર નામનું રમકડું ફેરવી શકીએ છીએ! અરે એ તો ઠીક આપણે આકાશમાં થી અવકાશમાં કલોરો ફ્લોરો ગેસો છોડી, ગુરુત્વાકર્ષણ ની એક બે ત્રણ કરીને પણ ઓઝોનમાં મસ મોટા ગાબડા પાડી શકીએ છીએ! મિત્રો આ અભિમાની પૃથ્વીથી જરા પણ ડરવાની જરૂર નથી! એને તો એમ જ છે કે "જાણે મારા જ આધારે જ આ મનુષ્યો ટકી રહ્યા છે!" હું તો કહુ છું કે તેના વાતાવરણ માંથી વૃક્ષોનું નિકંદન કાઢીને તેની 'હવા' જ કાઢી નાંખો, આપણે આર્ટિફિસિયલ ઈંટેલિજેન્સ થી નવી હવા (ઑક્સિજન) બનાવી ને તેને જડબાતોડ જવાબ આપીશું!

યાર આપણે ટ્વીટર અને ફેસબુક ઉપર સતત વૃક્ષ રોપો અભિયાન, પ્રકૃતિ બચાવો આંદોલનો અને જલ બચાવો પ્રકલ્પો ચલાવીએ છીએ તેની કદર જ નથી!! સોશિયલ મીડિયા ઉપર આપણે જે 'ઈ-પરસેવો' પાડીએ છીએ તેને તો આ એનાલોગ પૃથ્વી ઘ્યાને જ નથી લેતી લે! બતાવો તેને 'વર્ચ્યુઅલ પૃથ્વી બચાવો આંદોલન' બંધ થવાની તાકાત!

હે પૃથ્વી તે કદી તારી જાતને અમારા બનાવેલા સેટેલાઇટ કે સ્પેસ સ્ટેશનો માંથી નિહાળી છે! તારો બ્લુ ભાગ કેવો મસ્ત લાગે છે! ખ્યાલ પણ છે!! તારા ઘમંડને ચકનાચૂર કરી અમે આખી પૃથ્વી ને ગ્રીન માંથી બ્લુ બનાવીશું સમજી! જરૂર પડ્યે અમે હવે ચંદ્ર અને અમારું ગમે તેટલું અમંગળ થાય તો પણ મંગળ પર રહેવા જતા રહીશુ! બાકી તારા અને તારી નાની બહેન પ્રકૃતિના એકપણ નિયમો ને વશ તો નહી જ થઈએ!