કૃષિ સહાય પેકેજના ફોર્મ સંપૂર્ણપણે નિઃશુલ્ક છે, પૈસા ન આપવા સરકારે ખેડૂતોને કરી અપીલ.

કૃષિ સહાય પેકેજના ફોર્મ સંપૂર્ણપણે નિઃશુલ્ક છે, પૈસા ન આપવા સરકારે ખેડૂતોને કરી અપીલ

ગાંધીનગરઃ કમોસમી વરસાદના કારણે અનેક ખેડૂતોને મોટા પ્રમાણમાં નુકસાન થયું હતું. જેથી આ ખેડૂતો માટે ગુજરાત સરકાર દ્વારા કૃષિ સહાય પેકેજની જાહેરાત કરવામાં આવી હતી. આ કૃષિ સહાય પેકેજ અંગે ગુજરાત સરકાર દ્વારા મહત્વપૂર્ણ સ્પષ્ટતા કરવામાં આવી છે. સહાય માટેના ફોર્મ ભરાવવા ખેડૂતો પાસેથી પૈસા વસૂલાત હોવાની મળેલી ફરિયાદોના પગલે સરકારે તુરંત પગલું લઈ વિકાસ કમિશનરની કચેરી મારફતે પરિપત્ર જાહેર કર્યો છે. ગુજરાત સરકારને ફરિયાદ મળી હતી કે, કૃષિ સહાયના ફોર્મ ભરવા માટે કેટલાક લોકો ખેડૂતો પાસેથી રૂપિયા ઉઘરાવી રહ્યાં છે.

સહાયના ફોર્મ ભરાવવા કોઈપણને એક પણ રૂપિયો આપવાનો નથી

ગુજરાત સરકારે સ્પષ્ટતા કરી છે કે, કોઈ પણ ખેડૂતે સહાય માટેના ફોર્મ ભરાવવા કોઈપણને એક પણ રૂપિયો આપવાનો નથી. ફોર્મ ભરવાની અને સહાયની બધી પ્રોસેસ નિઃશુલ્ક છે. જે લોકો ખેડૂતો પાસેથી રૂપિયા ઉઘરાવી રહ્યાં છે તેમની સામે કાયદેસરની કાર્યવાહી કરવામાં આવશે. વિકાસ કમિશનરની કચેરીએ સ્પષ્ટ કર્યું છે કે, કૃષિ સહાય પેકેજના ફોર્મ ભરાવવા માટે અરજદારને કોઈપણ ઓપરેટર કે વ્યક્તિને એક પણ રૂપિયા આપવાની જરૂર નથી. આખી પ્રક્રિયા સંપૂર્ણપણે નિઃશુલ્ક રહેશે અને કોઈપણ પ્રકારની વસૂલાત કડક મનાઈ છે.

જો કોઈ વ્યક્તિ પૈસા માંગે તો તરત જ અધિકારીને જાણ કરવી

ગુજરાતના કેટલાક વિસ્તારોમાંથી એવી માહિતી મળી હતી કે, ફોર્મ ભરાવવા માટે ખેડૂતો પાસેથી પૈસા લેવામાં આવી રહ્યા છે. આ મુદ્દો સરકારના ધ્યાનમાં આવતા જ તરત સ્પષ્ટતા જાહેર કરવામાં આવી છે. સરકારએ જણાવ્યું છે કે જો કોઈ વ્યક્તિ પૈસા માંગે તો તરત જ સંબંધિત અધિકારીને જાણ કરવી જેથી તેની સામે કાર્યવાહી કરવામાં આવશે. કોઈપણ પ્રકારની ચૂકવણી કર્યા વગર અને સરકારી માર્ગદર્શિકા મુજબ નિઃશુલ્ક સેવા મેળવવા માટે જ ફોર્મ ભરાવે તેવી સરકારે તમામ ખેડૂતોને અપીલ કરી છે.